"Цагдаа", “Цагдаа жолооч”, "Хамгаалалтын ажилтан" мэргэжил олгох сургалт амжилттай зохион байгуулагдлаа

Цагдаагийн ерөнхий газрын дарга, Дотоодын цэргийн командлагчийн тушаалаар "Цагдаа", “Цагдаа жолооч”, "Хамгаалалтын ажилтан” мэргэжил олгох сургалт амжилттай зохион байгуулагдаж, 141 сонсогчид мэргэжлийн үнэмлэх гардуулах ёслолын арга хэмжээ өнөөдөр /2025.07.22/ боллоо.

Цагдаа, дотоодын цэргийн сургалтын нэгдсэн төв нь 2022 оноос хойш Цагдаа, дотоодын цэргийн “Хамгаалалтын ажилтан” мэргэжлээр боловсон хүчин бэлтгэх сургалтыг зохион байгуулан 1000 орчим алба хаагчийг төгсгөсөн ба өнөөдөр 10 дахь удаагийн төгсөлт тохиож байна.

Энэ удаагийн төгсөгчдөөс онцолбол:

202 дугаар дамжааны сонсогч Т.Чойсүрэндорж, 201 дүгээр дамжааны сонсогч Б.Тэмүүжин нар эх, үрсийг эмнэлгийн бус нөхцөлд эсэн мэнд амаржуулсан;

202 дугаар дамжааны дэд түрүүч О.Онкудаа нь “Эрэн сурвалжлах сан”-д зарлагдсан этгээдийг олж тогтоосон;

202 дугаар дамжааны сонсогч Б.Билгүүн нь залилах гэмт хэргийг шуурхай илрүүлэн, таслан зогсоож, цагдаагийн байгууллагын бүртгэлд авхуулсан;

204 дүгээр дамжааны сонсогч Ц.Ганбаяр, М.Дагвадорж, Т.Өсөхбаяр нар усанд эрсдэх аюулаас сэрэмжилж, хүний амь насыг аварсан зэрэг ур чадвар, хичээл зүтгэл гарган суралцсанд талархал илэрхийлж, урамшууллаа.

Нийт төгсөгчид, тэдний гэр бүлийнхэнд баяр хүргэж, хуулиар хүлээсэн үндсэн чиг үүргээ нэр төртэй биелүүлэх их үйлсэд нь амжилт хүсье.